ISUZUMA RYAGARAGAJE UKO UTURERE DUHAGAZE MU BUMWE N'UBWIYUNGE MURI 2019-2020

Mu rwego rwo kwimakaza ubumwe n’ubwiyunge no guteza imbere uruhare rw’inzego z’ibanze mu bikorwa byimakaza ubumwe n’ubwiyunge, Komisiyo y’Igihugu y’Ubumwe n’Ubwiyunge ikora isuzuma ngarukamwaka ry’ibikorwa by’Uturere mu bumwe n’ubwiyunge, ikagaragaza uko Uturere twarushanijwe mu kubiteza imbere. Uturere 3 twa mbere duhabwa igikombe (Unity and Reconciliation Trophy).           

Isuzuma ryakozwe hashingiwe ku ngingo eshatu z’ingenzi arizo iteganyabikorwa ry’Uturere ry’umwaka wa 2019-2020 na raporo z’ibikorwa zaturutse mu Turere;igenzura ku iyubahirizwa ry’amahame y’ubumwe n’ubwiyunge ryakozwe mu Turere twose mu mwaka wa 2019/2020, n’uko abaturage babona ibibakorerwa mu Karere biranga ubumwe n’ubwiyunge.

Amanota y’Uturere mu bumwe n’ubwiyunge 2019-2020

Hashingiwe ku byavuye mu isuzuma bigaragarira mu manota, Uturere twashyizwe mu byiciro mu buryo bukurikira:

• Icyiciro cya mbere: 88 - 80% (Uturere 11)
• Icyiciro cya kabiri: 79% - 70% (Uturere 18)
• Icyiciro cya gatatu: 69% - 60% (Akarere 1) 

Komisiyo y’Igihugu y’Ubumwe n’Ubwiyunge irashima  ko  ibikorwa by’ubumwe n’ubwiyunge bigaragara mu iteganyabikorwa ry’Uturere no mu mihigo; ibikorwa by’ubumwe n’ubwiyunge byitaweho muri rusange hakaba n’Uturere dufite akarusho;inama ngarukagihembwe zihuza abagize ubuyobozi bwa buri Karere n’intumwa za NURC zikunganira muri gahunda z’ubumwe n’ubwiyunge  zihabwa agaciro zikagira uruhare mu gufasha Uturere  kwinjiza ibikorwa by’ubumwe n’ubwiyunge mu iteganyabikorwabikorwa no gusuzuma imigendekere yabyo ku buryo buhoraho; ibiganiro bya Ndi Umunyarwanda birakorwa mu nzego zose kandi biritabirwa; uturere twasuye abagororwa muri za Gereza zinyuranye, nyuma y’iki gikorwa,    hari Uturere twatangije ibikorwa by’isanamitima no guhuza abagize uruhare muri Jenoside; mu Turere haragara ibikorwa by’umwihariko biteza imbere ubumwe n’ubwiyunge.